Ju jeni kripa e tokës - E Enjte 8 Gusht 2013

Leximi i parë: 2 e Timoteut 4:1-5
Psalm: Psalm 37:3-6, 30-31
UNGJILLI: Mateu 5:13-16

---

Leximi i parë: 2 e Timoteut 4:1-5

¹ Po të përbej para Hyjit dhe para Krishtit Jezus, i cili do të gjykojë të gjallët e të vdekurit: pash Ardhjen e tij dhe Mbretërinë e tij:
² predikoje Fjalën, nxit në rast të volitshëm dhe në rast të pavolitshëm, këshillo, qorto, urdhëro me plot duresë dhe mësim!
³ Sepse do të vijë koha, kur njerëzit nuk do ta durojnë mësimin e shëndoshë, por, sipas ëndjeve të veta, do të bashkojnë rreth vetes mësues për të kënaqur veshin;
⁴ do t’i largojnë veshët prej së vërtetës dhe do t’i sjellin drejt përrallave.
⁵ Ti veç rri zgjuar në çdo gjë me kujdes, duroji të vështirat, kryeje mirë detyrën e ungjilltarit, kryeje plotësisht shërbesën tënde!

 

Psalm: Psalm 37:3-6, 30-31

 

3	Ki besim tek Zoti dhe bëj të mira; bano vendin dhe shto besnikërinë.
4	Gjej kënaqësinë tënde në Zotin dhe ai do të plotësojë dëshirat e zemrës sate.
5	Vendose fatin tënd tek Zoti, ki besim tek ai dhe ai ka për të vepruar.
6	Ai do të bëjë të shkëlqejë drejtësia jote si drita dhe ndershmëria e saj si mesdita.

30	Nga goja e të drejtit del dituri dhe gjuha e tij flet për drejtësi.
31	Ligji i Perëndisë të tij është në zemrën e tij; hapat e tij nuk do të lëkunden.

UNGJILLI: Mateu 5:13-16

Kripa e tokës e drita e botës

(Mk 9, 50; Lk 14, 34 35)

¹³ “Ju jeni kripa e tokës. Po qe se kripa prishet, me çka mund të kripet? S’vlen më për asgjë, përveçse të hidhet jashtë e ta shkelin njerëzit.

¹⁴ Ju jeni drita e botës. Nuk mund të fshihet qyteti i ngritur në majë të malit.

¹⁵ As nuk ndizet dritëza për ta vënë nën magje, por për ta vënë mbi pishtar për t’u bërë dritë të gjithëve në shtëpi.

¹⁶ Ashtu të shndrisë edhe drita juaj para njerëzve, që t’i shohin veprat tuaja të mira e ta lëvdojnë Atin tuaj që është në qiell.”