Gjaku i Krishtit do ta pastrojë ndërgjegjen tonë nga veprat e vdekura për t’i shërbyer Hyjit të gjallë!

Leximi i pare: Hebrenjve 9:2-3, 11-14

Psalmet 47:2-3, 6-9

Ungjilli: Marku 3:20-21

Leximi i pare: Hebrenjve 9:2-3, 11-14

 2 Dhe njëmend qe ndërtuar Tenda. Në pjesën e parë të saj ishte qirimbajtësja, tryeza dhe bukët e kushtimit, dhe quhet Shenjtërorja. 3 Pastaj, pas tisit të dytë, ishte pjesa e dytë e Tendës, që quhet Shenjtërorja e Shenjtëroreve. ¹¹ Por erdhi Krishti, Kryeprifti i të mirave që do të vijnë. Dhe, nëpër një tendë më të madhe dhe më të përsosur, të punuar jo me dorë - d. m. th. jo të kësaj krijese ¹² dhe nëpër gjak jo të cjepve dhe të mëzetërve, por nëpër gjak të vet, hyri njëherë e përgjithmonë në Shenjtëroren e Shenjtëroreve dhe fitoi shpërblimin përfundimtar. ¹³ Dhe njëmend, në qoftë se gjaku i stërpikur i cjepve dhe i mëzetërve dhe hiri i mështjerrës i shenjtëron të papastrit duke ua pastruar ritualisht trupin, ¹⁴sa më tepër Gjaku i Krishtit - i cili nëpër Shpirtin e amshuar ia flijoi vetveten Hyjit porsi fli të panjollë - do ta pastrojë ndërgjegjen tonë nga veprat e vdekura për t’i shërbyer Hyjit të gjallë!

Psalmet 47:2-3, 6-9

² Duartrokitni, o popuj të gjithë,

brohoritni Hyjit me zë gëzimi!

³ Sepse Hyji është i tejetlartë, i tmerrshëm,

Mbreti i madh mbi tokën mbarë.

⁶ Ngjitet Hyji me brohori,

Zoti me zë trumbete.

⁷ Këndoni Hyjit, këndoni,

këndoni mbretit tonë, këndoni!

⁸ Sepse Hyji është mbreti i mbarë tokës:

këndoni këngë me mjeshtëri!

⁹ Hyji mbretëron mbi mbarë popujt,

Hyji rri mbi fronin e vet të shenjtë.

Ungjilli: Marku 3:20-21

²⁰ Jezusi u kthye në shtëpi. Prapë u mblodh turmë e madhe sa që as nuk mund të hanin bukë. 21 Kur morën vesh të tijtë, shkuan ta marrin sepse flitej: “Nuk është në vete.”