Leximi i parë: Jakobi 1:1-11
Psalm: Psalm 119:67-68, 71-72, 75-76
UNGJILLI: MARKU 8:11-13
Leximi i parë: Jakobi 1:1-11
1 Jakobi, shërbëtori i Hyjit dhe i Jezu
Krishtit Zot: dymbëdhjetë fiseve të shpërndara anë e kënd nëpër botë: Përshëndetje.
Feja dhe urtia
2 Çmoni për gëzim të vërtetë, vëllezërit e mi, kur t’ju ndodhë të sprovoni çdo lloj vështirësie,
3 duke e ditur se prova e fesë suaj lind qëndrueshmërinë.
4 Por qëndresa le të ushtrohet me përpikëri që të jeni të përkryer dhe të përsosur pa asnjë të metë.
5 Në qoftë se ndokujt prej jush i mungon urtia, le t’ia lypë Hyjit, i cili gjithkujt i jep me ëndje e pa fjalë, dhe do t’i jepet.
6 Por le ta kërkojë me fe të gjallë, pa farë dyshimi; sepse ai që dyshon i përngjan valës së detit që e çon peshë era dhe e përplas.
7 Njeriu i tillë të mos mendojë se do të marrë gjë prej Zotit
8 – njeriu me dy mëndje, i paqëndrueshëm në të gjitha udhët e veta.
Varfëria dhe pasuria
9 Vëllai me prejardhje të ulët le të mburret me lartësimin e tij,
10 kurse pasaniku për përvujtërimin e tij, sepse do të mbarojë porsi lulja e barit.
11 Lindi dielli me vapën e vet, e thau barin dhe lulja e tij u vyshk: hijeshia e fytyrës u zhduk. Kështu do të thahet edhe pasaniku në ndërmarrjet e veta.
Psalm: Psalm 119:67-68, 71-72, 75-76
67 Para se sprovova vuajtjen u enda larg
teje,
por tani unë e mbaj fjalën tënde.
68 Ti je i mirë e bën mirë,
ma mëso vullnetin tënd.
71 Është mirë për mua që vuajta,
kështu do ta mësoj vullnetin tënd.
72 Më i mirë është për mua Ligji yt
se me mijëra ar e argjend.
75 E di, o Zot, se gjyqet e tua janë të drejta,
me plot të drejtë më përule.
76 Le të më ngushëllojë, pra, mëshira jote
sipas premtimit që i dhe shërbëtorit
tënd.
UNGJILLI: MARKU 8:11-13
Farisenjtë kërkojnë shenjë
(Mt 16, 1‑4)
11 Atëherë erdhën farisenjtë dhe filluan të rragaten me të. Duke e vënë në provë kërkuan prej tij një shenjë prej qiellit.
12 Jezusi duke fsharë prej fundit të shpirtit, tha: “Përse kjo brezni kërkon shenjë? Për të vërtetë, po ju them: kësaj breznie s’do t’i jepet shenjë!”
13 Atëherë i la, përsëri hipi në barkë dhe kaloi në anën tjetër.
Është e nevojshme,
gjithashtu, që ne të heqim dorë nga rrethanat që kanë qënë shkaku i mëkatit. Ne
duhet të kthehemi tek lutja e zjarrtë, të marrin sakramentet shpeshë dhe me
merita. Ai që e bën këtë sigurisht që do të vazhdoj me këmbngulje.
-- Shën Gjon Viannei