Pages

Merre fëmijën dhe nënën e tij e ik në Egjipt - E Shtunë 28 Dhjetor 2013

Leximi i parë: 1 e Gjonit 1:5 -- 2:2
Psalm: Psalm 124:2-5, 7-8
UNGJILLI: MATEU 2:13-18



Leximi i parë: 1 e Gjonit 1:5 -- 2:2

5 Dhe kjo është shpallja që e dëgjuam prej tij dhe po jua kumtojmë juve: Hyji është dritë dhe në Të nuk ka kurrfarë errësire! 

6 Nëse themi: »Kemi bashkësi me Të«, por jetojmë në errësirë, ne rrejmë dhe nuk e ushtrojmë të vërtetën. 

7Por, nëse ne ecim në dritë, sikurse Ai është në dritë, kemi bashkësi me njëri-tjetrin dhe gjaku i Jezusit, Birit të tij, na pastron nga çdo mëkat. 

8 Por nëse themi: »Ne nuk kemi mëkat«, gënjejmë vetveten dhe e vërteta nuk është në ne. 

9 Por, nëse i pranojmë mëkatet tona, Ai është besnik dhe i drejtë: do të na i falë mëkatet dhe do të na pastrojë nga çdo padrejtësi. 

10 Por, nëse themi: »Ne nuk kemi mëkatuar«, e bëjmë Atë gënjeshtar dhe fjala e tij nuk është në ne.

1 Fëmijëzit e mi, po jua shkruaj këto që të mos mëkatoni. Por, edhe nëse ndokush mëkaton, e kemi Mbrojtësin te Ati – Jezu Krishtin, Të Drejtin. 

2 Ai është flia pajtuese për mëkatet tona, dhe jo vetëm për mëkatet tona, por edhe për të mbarë botës. 

Psalm: Psalm 124:2-5, 7-8

2 po të mos kishte qenë Zoti me ne,
kur njerëzit u ngritën kundër nesh:

3 atëherë do të na kishin përpirë gjallë,
kur u mori flakë zemërimi kundër nesh.

4 Atëherë ujët do të na kishte marrë,
rrjedha e përroit do të na kishte marrë,

5 do të na kishin mbytur
valët e ujërave të tërbuara!

7 Shpirti ynë shpëtoi si trumcaku
prej gracke të gjuetarëve:
laku u këput
e ne shpëtuam!

8 Ndihma jonë është në Emër të Zotit,
që krijoi qiellin e tokën.


UNGJILLI: MATEU 2:13-18

Ikja në Egjipt

13 Pasi u nisën Dijetarët, ja se, engjëlli i Zotit iu dëftua në ëndërr Jozefit e i tha: “Çohu, merre fëmijën dhe nënën e tij e ik në Egjipt. Rri atje derisa të them unë, sepse Herodi do ta kërkojë fëmijën për ta vrarë.” 

14 Ky u çua, natën e mori fëmijën dhe të ëmën e tij e shkoi në Egjipt. 

15 Banoi atje derisa vdiq Herodi që të plotësohej fjala e Zotit e thënë me gojë të profetit: “Nga Egjipti e thirra Birin tim.”

Vrasja e fëmijëve të pafajshëm

16 Atëherë Herodi, kur pa se e mashtruan Dijetarët, u zemërua së tepërmi dhe urdhëroi të vriteshin të gjithë fëmijët meshkuj që ishin në Betlehem dhe në mbarë rrethinën e tij dy vjeç e poshtë ‑ sipas kohës që me kujdes e mori vesh nga Dijetarët.

17 Atëherë u plotësua fjala e Jeremisë profet:

18 “U dëgjua një klithmë në Ramë
‑ vaj e gjëmë e madhe:
vajton Rakela fëmijët e vet
e nuk do të pajtohet ‑ sepse nuk i ka më!”


E kanë marrë Zotërinë prej varrit - E Premte, 27 Dhjetor 2013

Leximi i parë: 1 e Gjonit 1:1-4
Psalm: Psalm 97:1-2, 5-6, 11-12
UNGJILLI: Gjoni 20:1-8



Leximi i parë: 1 e Gjonit 1:1-4

1Çka ishte që në fillim, çka dëgjuam, çka pamë me sytë tanë, çka soditëm dhe duart tona prekën, në lidhje me Fjalën e jetës, 

2 – po, Jeta u shfaq, ne e pamë dhe dëshmojmë dhe ju kumtojmë Jetën e pasosur, që ishte te Ati dhe na u shfaq neve – 

3 çka pamë e dëgjuam po jua kumtojmë edhe juve që edhe ju të keni bashkësi me ne. E bashkësia jonë është me Atin dhe me Birin e tij, Jezu Krishtin. 

4 Po ju shkruajmë këto që gëzimi ynë të jetë i plotë.


Psalm: Psalm 97:1-2, 5-6, 11-12

Zoti ngadhënjen

1 Zoti mbretëron! Le të galdojë toka,
le të gëzohen ishujt e shumtë!

2 Re e errësirë janë përreth tij,
e Drejta e Drejtësia themeli i fronit të tij.

5 Para fytyrës së Zotit si dylli shkrihen malet,
para fytyrës së Zotit të mbarë botës!

6 Qiejt e shpallin drejtësinë e tij,
të gjithë popujt e shohin lavdinë e tij.

11 Lindi drita për të drejtin,
e gëzimi për zemërmirët.

12 Gëzohuni, o të drejtë, në Zotin,
nderojeni Emrin e tij të shenjtë.


UNGJILLI: Gjoni 20:1-8

1 Ditën e parë të javës, në mëngjes, ende pa dalë drita, erdhi Maria Magdalenë te varri dhe pa se guri ishte hequr prej varrit. 

2 Atëherë erdhi me vrap te Simon‑Pjetri dhe tek ai nxënësi tjetër, të cilin Jezusi e donte dhe u tha: “E kanë marrë Zotërinë prej varrit e nuk dimë se ku e kanë vënë.”

3 Atëherë dolën Pjetri dhe ai nxënësi tjetër e u nisën drejt varrit. 

4 Vraponin të dy bashkë, por ai nxënësi tjetër ia kaloi Pjetrit dhe arriti i pari te varri. 

5 Ai u përkul dhe pa pëlhurat e vëna aty, por nuk hyri. 

6 Ndërkaq mbërriti edhe Simon‑Pjetri që po vinte pas tij dhe hyri në varr. I pa pëlhurat e vëna 

7 dhe rizën që pati qenë në kokë të Jezusit. Kjo nuk ishte me pëlhura, por veçmas e palosur në një vend.

8 Atëherë hyri edhe ai nxënësi tjetër, që mbërriti i pari te varri, pa e besoi. 



Arsyeja përse disaherë ju keni kërkuar dhe nuk keni marrë, është sepse ju keni kërkuar jo ashtu si duhet, ose jo rregullisht, ose pak, ose ju keni kërkuar çfarë nuk është e mirë për ju, ose sepse ju keni ndaluar së kërkuari.

-- Shën Basili


Virgjëra do të mbesë shtatzënë e do të lindë një djalë - E Mërkurë 18 Dhjetor 2013

Leximi i parë: Jeremia 23:5-8
Psalm: Psalm 72:1-2, 12-13, 18-19
UNGJILLI: MATEU 1:18-25


Leximi i parë: Jeremia 23:5-8

5 “Ja, po vijnë ditët ‑ është fjala e Zotit ‑ kur do t’ia ngre Davidit pinjollin e drejtë; që do të mbretërojë si mbret i vërtetë dhe do të jetë i urtë
e do të ushtrojë në vend të drejtën e drejtësinë.

6 Ndër ato ditë Juda do shpëtojë e Izraeli do të jetojë në paqe.
Ja emri me të cilin do ta quajnë: “Zoti ynë ‑ drejtësia ‑ jonë”!

7 Prandaj, ja po vijnë ditët ‑ është fjala e Zotit ‑ kur nuk do të thuhet më: “Pasha Zotin e gjallë, që i nxori bijtë e Izraelit nga toka e Egjiptit!”, 

8 por: “Pasha Zotin e gjallë, që e nxori dhe e solli farën e shtëpisë së Izraelit nga toka e Veriut dhe nga të gjitha vendet”, ku i kisha flakur; dhe do të banojnë në vendin e vet.”

Psalm: Psalm 72:1-2, 12-13, 18-19

Mbreti i premtuar

1 I Salomonit.
O Hyj, jepja mbretit gjyqin tënd
dhe drejtësinë tënde birit të mbretit,

2 që ta gjykojë popullin tënd me drejtësi
e skamnorëve të tu t’u japë të drejtën.

12 Ai do ta shpëtojë skamnorin që fshan,
të varfërin që nuk ka ndihmëtar.

13 Mëshirë do të ketë për të mjerin e të vobektin,
dhe skamnorëve do t’ua shpëtojë jetën.

18 Qoftë bekuar Zoti Hyj, Hyji i Izraelit,
që i vetmi bën mrekulli!

19 Qoftë bekuar Emri i tij i madhërueshëm,
toka mbarë u mbushtë me lavdinë e tij.
Amen! Amen!


UNGJILLI: MATEU 1:18-25

Lindja e Jezu Krishtit
(Lk 2, 1 ‑ 7)

18 Lindja e Jezu Krishtit ndodhi kështu:
Maria, nëna e tij, pasi u fejua me Jozefin, para se të banonin së bashku, u gjend shtatzënë për virtyt të Shpirtit Shenjt.

19 Tashti Jozefi, i fejuari i saj, pasi ishte njeri i drejtë e nuk donte ta çnderonte botërisht, mendoi ta linte fshehtazi. 

20 Posa në mendjen e vet vendosi të bëjë kështu, ja, iu duk në ëndërr engjëlli i Zotit dhe i tha: “Jozef, biri i Davidit, mos ki frikë ta marrësh Marinë, të fejuarën tënde, sepse foshnja që është zënë në të, u zu për virtyt të Shpirtit Shenjt. 

21 Ajo do të lindë djalë e ti ngjitja emrin Jezus, sepse Ai do ta shëlbojë popullin e vet prej mëkateve të tij.” 

22 E gjithë kjo ndodhi që të shkonte në vend fjala e Zotit e thënë nëpërmjet profetit:

23 “Ja, Virgjëra do të mbesë shtatzënë e do të lindë një djalë,
të cilit do t’ia ngjesin emrin Emanuel ‑ që do të thotë: Hyji me ne!

24 Jozefi, si u zgjua nga gjumi, bëri siç i urdhëroi engjëlli i Zotit: e mori në shtëpi të fejuarën e vet. 

25 E, pa pasur marrëdhënie martesore me të, ajo lindi djalin, të cilit ia ngjiti emrin Jezus.




Ata që udhëhiqen nga Shpirti I Shenjtë kanë ide të vërteta. Prandaj dhe shumë njerëz të paditur janë më të mënçur se të mësuarit.

-- Shën. Gjon Vianney


Breznitë e Jezu Krishtit, të birit të Davidit, të birit të Abrahamit - E Martë 17 Dhjetor 2013

Leximi i parë: Zanafilla 49:2, 8-10
Psalm: Psalm 72:1-4, 7-8, 17
UNGJILLI: MATEU 1:1-17



Leximi i parë: Zanafilla 49:2, 8-10

2 Bashkohuni dhe dëgjoni, o bijtë e Jakobit, dëgjojeni Izraelin, atin tuaj!

8 O Judë, vëllezërit e tu do të lëvdojnë, dhëna jote në zverkun e armiqve të tu! Para teje do të përmbysen bijtë e babait tënd!

9 O Judë, luani i luanëve! Prej presë u ktheve, biri im! Shtrihej në pushim porsi luani, porsi luanesha: kush do të guxojë të të zgjojë?

10 Jo, prej Judës nuk do të hiqet sundimi as shkopi i prijësit nga këmbët e tija, deri që të vijë ai, të cilit i përket, të cilin do ta dëgjojnë popujt.

Psalm: Psalm 72:1-4, 7-8, 17

1 I Salomonit.
O Hyj, jepja mbretit gjyqin tënd
dhe drejtësinë tënde birit të mbretit,

2 që ta gjykojë popullin tënd me drejtësi
e skamnorëve të tu t’u japë të drejtën.

3 Malet le t’i sjellin paqen popullit
e kodrat drejtësinë.

4 Ai do t’i gjykojë të vobektët e popullit,
do t’i shpëtojë bijtë e skamnorit
do ta përulë shpifësin.

7 Në ditët e tija do të lulëzojë drejtësia
dhe paqe e madhe derisa të jetë hëna.

8 Do të sundojë prej detit në det,
prej Lumit e deri në skajin e botës.

17 Qoftë bekuar emri i tij në shekuj,
sa të jetë dielli mos iu harroftë emri!
Nëpër të do të bekohen të gjitha fiset e dheut,
të gjithë paganët të lumtur do ta quajnë.

UNGJILLI: MATEU 1:1-17

1 Breznitë e Jezu Krishtit, të birit të Davidit,
të birit të Abrahamit.

2 Abrahamit i lindi Izaku.
Izakut i lindi Jakobi.
Jakobit i lindi Juda dhe vëllezërit e tij.

3 Judës i lindi prej Tamarës Faresi dhe Zara.
Faresit i lindi Esromi.
Esromit i lindi Arami.

4 Aramit i lindi Aminadabi.
Aminadabit i lindi Naasoni.
Naasonit i lindi Salmoni.

5 Salmonit i lindi prej Rahabës Boozi.
Boozit i lindi prej Rutës Jobedi.
Jobedit i lindi Jeseu.

6 Jeseut i lindi Davidi mbret.
Davidit i lindi prej ish‑gruas së Urisë Salomoni.

7 Salomonit i lindi Roboami.
Roboamit i lindi Abiai.
Abiait i lindi Asafi.

8 Asafit i lindi Jozafati.
Jozafatit i lindi Jorami.
Joramit i lindi Ozia.

9 Ozisë i lindi Joatami.
Joatamit i lindi Akazi.
Akazit i lindi Ezekia.

10 Ezekisë i lindi Manaseu.
Manaseut i lindi Amosi.
Amosit i lindi Jozia.

11 Jozisë i lindi Jehonia dhe vëllezërit e tij në kohën e shpërnguljes në Babiloni.

12 Pas shpërnguljes në Babiloni,
Jehonisë i lindi Salatieli.
Salatielit i lindi Zorobabeli.

13 Zorobabelit i lindi Abiudi.
Abiudit i lindi Eliakimi.
Eliakimit i lindi Azori.

14 Azorit i lindi Sadoku.
Sadokut i lindi Akimi.
Akimit i lindi Eliudi.

15 Eliudit i lindi Eleazari.
Eleazarit i lindi Matani.
Matanit i lindi Jakobi.

16 Jakobit i lindi Jozefi, fati i Marisë,
prej së cilës lindi Jezusi që quhet Krisht.

17 Gjithsej, pra, katërmbëdhjetë brezni prej Abrahamit deri te Davidi; prej Davidit deri në shpërnguljen në Babiloni katërmbëdhjetë brezni; e prej shpërnguljes në Babiloni deri te Krishti katërmbëdhjetë brezni.



Është prej udhës së dashurisë, e cila është bamirësia, që Zoti afrohet pranë njeriut, dhe njeriu tek Zoti. Por atje ku bamirësia nuk gjendet, Zoti nuk mund të banoj. Nëse, ne atëherë e kemi bamirësinë, ne e kemi Zotin, sepse “Zoti është Bamirësia”.


-- Shën. Alberti i Madh

Nga ishte pagëzimi i Gjonit: Nga Qielli apo nga njerëzit? - E Hene 16 Dhjetor 2013

Leximi i parë: Numrat 24:2-7, 15-17
Psalm: Psalm 25:4-9
UNGJILLI: MATEU 21:23-27



Leximi i parë: Numrat 24:2-7, 15-17

2 Dhe, si i çoi sytë lart, pa Izraelin të zemërimiuar fis përbri fisi dhe, i rrëmbyer prej Shpirtit të Hyjit, 

3t’ia dha këngës së vet e tha:
“Parakallëzim i Balaamit, birit të Beorit,
parakallëzim i njeriut symprehtë,

4 parakallëzim i atij që ndjeu fjalën e Hyjit,
që sheh çka i dëfton i Gjithpushtetshmi,
që bie në ekstazë e atëherë i çelen sytë:

5 sa të bukura qenkan tendat e tua, o Jakob,
një bukuri zemërimia jote, o Izrael!

6 Si breglumi që shkon duke u shtrirë,
porsi kopshtet për anë të lumit,
si aloeja që e ka mbjellë Zoti,
porsi cedri për anë të ujit!

7 Do të rrjedhë ujë nga kovat e tija;
farës së tij uji s’i mungon.
Mbi Agagun ngallit mbreti i tij,
plot madhëri mbretëria e tij!

15 Pra, t’ia nisi këngës së vet e tha përsëri:
“Tha Balaami i Beorit,
tha njeriu symprehtë,

16 tha ai që ndjeu fjalën e Hyjit,
që sheh çka i dëfton i Gjithpushtetshmi,
që bie në ekstazë e sytë i ka çelur!

17 Po e shoh, por jo për tani,
po e vërej, por jo për së afërmi:
një Yll po lind prej Jakobit,
një skeptër po ngallit prej Izraelit,
i pëlcet tëmthat e bijve të Moabit,
butin e kresë të bijve të Setit!

Psalm: Psalm 25:4-9

4 Bëj t’i njoh, o Zot, udhët e tua
e m’i mëso shtigjet e tua.

5 Më drejto me të vërtetën tënde dhe më mëso,
sepse ti je Hyji im, Shëlbuesi im,
në ty shpresoj gjithmonë.

6 Të të bien në mend mëshirat e tua, o Zot,
dhe dashuria jote që është e amshueshme.

7 Mos i kujto fajet e rinisë sime e paudhësitë:
të të bie në mend për mua sipas dashurisë sate
‑ për hir të mirësisë sate, o Zot.

8 I ëmbël e i drejtë është Zoti,
mëkatarët i kthen në udhë të drejtë,

9 të përvuajtëve u prin në drejtësi,
të butëve ua mëson udhën e vet.


UNGJILLI: MATEU 21:23-27

Pushteti i Jezusit
(Mk 11, 27‑33; Lk 20, 1‑8)

23 Kur Jezusi hyri në Tempull e aty po mësonte, iu afruan kryepriftërinjtë e pleqtë e popullit dhe i thanë:
“Me ç’pushtet je duke bërë kështu? Kush ta dha këtë pushtet?”

24 Ai u përgjigj:
“Edhe unë do t’ju bëj një pyetje të vetme. Nëse ju më përgjigjeni, edhe unë do t’ju tregoj me ç’pushtet i bëj këto. 

25 Nga ishte pagëzimi i Gjonit: Nga Qielli apo nga njerëzit?”
Por ata mendonin me vete: “Në qoftë se themi: nga Qielli’, ai do të na thotë: ‘Përse atëherë nuk i besuat?’ 

26 e nëse i përgjigjemi: ‘prej njerëzve’, kemi frikë popullin, sepse të gjithë e mbajnë Gjonin për profet.”

27 Atëherë iu përgjigjën:
“Nuk e dimë!”
“As unë, pra, ‑ u tha ai ‑ s’po ju tregoj me ç’pushtet i bëj këto vepra!”




Unë duhet ta imagjinoj veten se nuk ka njeri tjetër në botë përveç Zotit dhe unë.


-- Shën. Alfonsus Ligori

S’ka gjë të pamundshme për Hyjin - E Enjte 12 Dhjetor 2013

Festa e Zonjës së Guadalupes: 12 Dhjetor

Leximi i parë: Zbulesa 11:19; 12:1-6, 10
UNGJILLI: LUKA 1:26-38



Leximi i parë: Zbulesa 11:19; 12:1-6, 10

19 Atëherë u hap tempulli i Hyjit që është në qiell dhe u duk Arka e Besëlidhjes së tij në tempullin e tij, shpërthyen vetëtima, gjëmë e rrufe, tërmet dhe breshër i madh!

1 Në qiell u duk një shenjë e madhërueshme: një Grua e veshur me diell, me hënë nën këmbë, në kokë kezën me dymbëdhejtë yje!

2 Shtatëzënë, bërtiste në mundime, në dhimbjet e lindjes.

3 Pastaj në qiell u duk edhe një shenjë tjetër: Ja, Dragoi! I madh, i zjarrtë, me shtatë kokë e dhjetë brirë! Mbi kokë shtatë kurorë!           

4 Bishti i tij tërhiqte pas vetes një të tretën e yjeve të qiellit - dhe i rrëzoi për tokë!

Dragoi zuri vend para Gruas që po lindte fëmijën që, posa të lindte fëmijën, t’ia hante.

5 Dhe Ajo lindi fëmijën - një Djalosh - që do të sundojë të gjithë popujt me skeptër hekuri.

Por Fëmija i Saj qe sjellë te Hyji dhe te froni i tij, 

6 kurse Gruaja iku në shkretëtirë ku Hyji i përgatiti një vend që atje të ushqehej për një mijë e dyqind e gjashtëdhjetë ditë.

10 Atëherë dëgjova një zë të madh në qiell, që thoshte: »Ja, tani koha e shëlbimit, e pushtetit dhe e Mbretërisë së Hyjit tonë dhe e sundimit të Krishtit të tij! Sepse u hodh poshtë paditësi i vëllezërve tanë që ditë e natë i padiste para Hyjit tonë.

UNGJILLI: LUKA 1:26-38

Lajmërimi i lindjes së Jezusit

26 Në të gjashtin muaj, Hyji e dërgoi engjëllin Gabriel në një qytet të Galilesë, që quhet Nazaret, 

27 te një virgjër, që ishte e fejuar me një njeri, që quhej Jozef, prej fisit të Davidit. Virgjëra quhej Mari.

28 Engjëlli hyri tek ajo dhe i tha:
“Të falem, o Hirplote! Zoti me ty!”

29 Kjo fjalë e shqetësoi Marinë dhe zuri të mendojë: ç’do të thotë kjo përshëndetje.

30 Por engjëlli i tha:
“Mos ki frikë, o Mari, sepse ke gjetur hir para Hyjit!

31 Ja, do të mbetesh shtatzënë e do të nxjerrësh në dritë një djalë e ngjitja emrin Jezus. 

32 Ky do të jetë i madh dhe do të quhet Biri i Hyjit tejet të lartë. Zoti Hyj do t’ia japë fronin e Davidit, atit të tij. 

33 Ai do të mbretërojë përgjithmonë mbi shtëpinë e Jakobit dhe mbretëria e tij s’do të ketë mbarim.”

34 Atëherë Maria i tha engjëllit:
“Si do të mund të ndodhë kjo, ndërsa unë jam virgjër?”

35 Engjëlli iu përgjigj:
“Shpirti Shenjt do të zbresë në ty e fuqia e Hyjit të tejetlartë do të të mbulojë me hijen e vet; prandaj ky Fëmijë do të jetë i shenjtë ‑ Biri i Hyjit. 

36 Dhe ja, Elizabeta, kushërira jote, edhe ajo, në pleqërinë e saj, pret t’i lindë djali. Ajo që mbahet beronjë, është në të gjashtin muaj. 

37 Vërtet, s’ka gjë të pamundshme për Hyjin!

38 Atëherë Maria tha:
“Unë jam shërbëtorja e Zotit: Më ndodhtë siç the ti!”
Atëherë engjëlli u largua prej pranisë së saj.