Pages

Përse ju vetë nuk gjykoni vetvetiu ç’është e drejtë? - E Premte 25 Tetor 2013

Leximi i parë: Romakëve 7:18-25
Psalm: Psalm 119:66, 68, 76-77, 93-94
UNGJILLI: LUKA 12:54-59



Leximi i parë: Romakëve 7:18-25

18 Dhe e di se e mira nuk banon në mua ‑ d. m. th. në natyrën time trupore: sepse ta dua të mirën jam i zoti, por jo edhe të veproj të mirën, 

19 pasi nuk bëj të mirën që dua, por të keqen që nuk e dëshiroj, atë bëj. 

20 Në qoftë, pra, se bëj atë që [unë] nuk do të dëshiroja ta bëja, kurrsesi nuk jam ai që e bëj atë, por mëkati që banon në mua.

21 Gjej, pra, se është ky ligj: kur dua të bëj të mirën, më vjen përdoresh e keqja. 

22 Në qenien time të brendshme me kënaqje të plotë përkoj me Ligjin e Hyjit, 

23 porse hetoj në gjymtyrët e mia një ligj tjetër, i cili lufton kundër ligjit të arsyes sime dhe më robëron me ligjin e mëkatit, që banon në gjymtyrët e mia.

24 Oh sa njeri i mjerë që jam! Kush do të më çlirojë nga ky trup që i përket vdekjes? 

25 Lavdi Hyjit nëpër Jezu Krishtin, Zotin tonë! Prandaj: unë me mendje i shërbej Ligjit të Hyjit, kurse me trup ligjit të mëkatit.


Psalm: Psalm 119:66, 68, 76-77, 93-94

66 Ma mëso mirësinë, urtinë e dijen,
sepse u besoj urdhërimeve të tua.

68 Ti je i mirë e bën mirë,
ma mëso vullnetin tënd.

76 Le të më ngushëllojë, pra, mëshira jote
sipas premtimit që i dhe shërbëtorit tënd.

77 Ardhtë mbi mua mëshira jote e do të jetoj,
sepse Ligji yt është kënaqësia ime.

93 Kurrë e për këtë jetë s’do t’i harroj urdhërimet e tua,
në saje të tyre ti më mban në jetë.

94 Yti jam: deh, ti më shpëto,
sepse i kërkoj me zell urdhërimet e tua.


UNGJILLI: LUKA 12:54-59

Shenjat e kohës
(Mt 16, 2‑3)

54 Pastaj iu drejtua turmës:
“Kur shihni renë se çohet në perëndim, përnjëherë thoni: ‘Do të bjerë shi!’, dhe ashtu ndodh. 

55 Kur shihni se fryn shiroku, thoni: ‘Do të jetë vapë’, dhe bën vapë. 

56 Shtiracakë! Dukën e tokës e të qiellit dini ta çmoni, por këtë kohë nuk dini!?”

Ndrequ me paditësin tënd
(Mt 5, 25‑26)

57 “Përse ju vetë nuk gjykoni vetvetiu ç’është e drejtë? 

58 Kështu, kur shkon bashkë me kundërshtarin tënd tek ushtruesi i drejtësisë, përpiqu udhës të biesh në ujdi me të ‑ që të mos nxjerrë para gjykatësit, gjykatësi të të dorëzojë shërbëtorit e shërbëtori të të hedhë në burg. 

59 Unë po të them se s’do të dalësh prej andej pa e paguar edhe më të fundit qindarkë.”



Lum shërbëtorët që, kur kthehet zotëria, i gjen zgjuar! - E Marte, 22 Tetor 2013

Leximi i parë: Romakëve 5:12, 15, 17-19, 20-21
UNGJILLI: LUKA 12:35-38



Leximi i parë: Romakëve 5:12, 15, 17-19, 20-21

12 Për këtë arsye, sikurse me anë të një njeriu mëkati hyri në botë e, me anë të mëkatit, vdekja, dhe kështu vdekja kaloi në të gjithë njerëzit, sepse të gjithë njerëzit mëkatuan... 

15 Por me dhuratën e hirit nuk ngjau si me mëkatin. Sepse, në qoftë se me mëkatin e një njeriu të vetëm, vdiqën të gjithë njerëzit, shumë më tepër u ndikua mbi të gjithë njerëzit hiri i Hyjit dhe dhurata e dhënë për hir të një Njeriu të vetëm ‑ Jezu Krishtit. 

17 Kështu, pra, nëse me anë të mëkatit të një njeriu të vetëm, mbretëroi vdekja ‑ për shkak të një njeriu të vetëm ‑ me më shumë arsye do të mbretërojnë në jetë ata që marrin begatinë e pamasë të hirit e të dhuratës së drejtësisë nëpër një të vetmin ‑ Jezu Krishtin.

18 Prandaj, mëkati i njërit ‑ dënim për të gjithë njerëzit, gjithashtu edhe drejtësia e Njërit ‑ shfajësim që u jep jetën të gjithë njerëzve. 

19 Vërtet, sikurse me padëgjesën e njërit, mëkatuan të gjithë njerëzit, po ashtu, me dëgjesën e Njërit ‑ të gjithë njerëzit do të bëhen të drejtë.

20 Ligji erdhi që të shumëzohet mëkati; porse, kur u shumëzua mëkati, shumë më i begatshëm u bë hiri, 

21 që, sikurse mëkati mbretëroi me vdekjen, po ashtu edhe hiri të mbretërojë me drejtësinë ‑ për jetën e pasosur, nëpër Jezu Krishtin, Zotin tonë.



UNGJILLI: LUKA 12:35-38

Shërbëtori i kujdesshëm
(Mt 24, 45‑51)

35 “Jini gati ‑ të veshur e të ngjeshur me llamba të ndezura ‑ 

36 porsi ata që presin zotërinë e vet kur kthehet prej dasmës për t’ia çelur derën posa të vijë e të trokëllitë. 

37 Lum shërbëtorët që, kur kthehet zotëria, i gjen zgjuar! Përnjëmend po ju them: ai vetë do të ngjeshet, ata do t’i ulë në tryezë, do të afrohet dhe vetë do t’i shërbejë. 

38 Po erdhi në të dytën ose në të tretën rojë të natës dhe, po i gjeti kështu, lum ata!



Kur të të thërras në ndihmë, më dëgjo, o Hyj, drejtësia ime!
Ti që më shpëtove në vështirësi:
ki mëshirë për mua e ma dëgjo lutjen!


-- Psalm lv. 2

Ruajuni fort prej lakmisë së pasurisë - E Hene 21 Tetor 2013

Leximi i parë: Romakëve 4:20-25
Psalm: Luka 1:69-75
UNGJILLI: LUKA 12:13-21



Leximi i parë: Romakëve 4:20-25

20 Nuk dyshoi në premtimin e Hyjit, por u forcua me anë të fesë dhe i dha lavdi Hyjit 

21 plotësisht i bindur se çka i premtoi Hyji, ai edhe do ta çojë në vend. 

22 Ja, pra, përse kjo gjë iu numërua për drejtësi.

23 Por nuk ishte shkruar vetëm për të: ‘iu numërua... ’, 

24 por se do të na numërohet edhe neve, të cilët besojmë në Atë që e ngjalli nga të vdekurit Jezusin, Zotin tonë, 

25 i cili u flijua për faje tona dhe u ngjall për shfajësimin tonë.


Psalm: Luka 1:69-75

69 Ai e ngriti Shpëtimtarin tonë
në shtëpinë e Davidit, shërbëtorit të vet,

70 sikurse premtoi kaherë me gojë të profetëve të tij të shenjtë:

71 se do të na shpëtojë prej armiqve tanë dhe prej dorës së të gjithë atyre që na urrejnë;

72 se do të bëjë mirësinë që ua premtoi etërve tanë e do t’i bjerë në mend Besëlidhja e tij e shenjtë

73 e betimi që bëri në të mirën e Abrahamit, atit tonë, se do të na e bëjë të mundshme 

74 t’i shërbejmë pa frikë,
të çliruar nga duart e armikut 

75 në shenjtëri e drejtësi para tij për çdo ditë të jetës sonë.


UNGJILLI: LUKA 12:13-21

Shëmbëlltyra e pasanikut të pamend

13 Atëherë dikush prej turmës i tha:
“Mësues, thuaji vëllait tim ta ndajë me mua trashëgimin tonë.”

14 “Or mik, ‑ iu përgjigj Jezusi ‑ kush më vuri mua gjykatës ose ndarës mbi ju?”

15 Atëherë u tha:
“Vëriani mendjen: ruajuni fort prej lakmisë së pasurisë, sepse sado i pasur që ndokush të jetë, jeta e tij nuk varet nga pasuria që ka.”

16 Atëherë u tregoi këtë shëmbëlltyrë:
“Tokat e një pasaniku i dhanë fryt të madh. 

17 Ai mendonte me vete e thoshte: ‘Ç’të bëj? Nuk kam më vend ku të mbledh të lashtat e mia. ’

18 Dhe tha: ‘Kështu po bëj: do t’i rrëzoj grunarët e do t’i punoj më të mëdhenj dhe do t’i mbledh në ta të gjitha: grurin dhe të gjitha të lashtat e mia. 

19 Atëherë do t’i them shpirtit tim: shpirti im, ke pasuri me shumicë për shumë vjet: pusho, ha, pi, gëzo!’ 

20 Porse Hyji i tha: ‘I marrë! Pikërisht sonte, në këtë natë, do të kërkohet shpirti yt prej teje, e ç’grumbullove kujt do t’i mbesë?’ 

21 Kështu i ndodh atij që grumbullon pasuri për vete e nuk kujdeset të bëhet i pasur në Hyjin.”


Sytë e mi përherë i drejtoj te Hyji, sepse ai i nxjerr këmbët e mia prej lakut. Më shiko, o Zot, e ki dhembje për mua, sepse jam i vetmuar e i mjerë.

-- Psalm 24:15,16

Do të kërkohet llogari prej kësaj breznie - E Enjte 17 Tetor 2013

Leximi i parë: Romakëve 3:21-30
Psalm: Psalm 130:1-6     
UNGJILLI: LUKA 11:47-54


Leximi i parë: Romakëve 3:21-30

Shfajësimi i plotë me anë të fesë

21 Tani veç, pavarësisht nga Ligji, u dëftua vepra shëlbimtare e Hyjit, e dëshmuar prej Ligjit e prej Profetëve, 

22 vepra shëlbimtare e Hyjit me anë të fesë në Jezu Krishtin për të gjithë ata që besojnë ‑ pa farë dallimi, 

23 sepse të gjithë mëkatuan dhe u përjashtuan nga lumturia e Hyjit ‑ 

24 e me hirin e tij, të gjithë e fituan falas drejtësinë, në saje të shpërblimit që bëri Jezu Krishti. 

25 Atë Hyji e caktoi të jetë, në saje të fesë, fli pajtuese me anë të gjakut të vet. Deshi kështu të tregojë drejtësinë e vet, sepse i la pa ndëshkuar mëkatet e mëparshme në kohën e durimit të vet ‑ 

26 e në kohën e tashme e dëfton drejtësinë e vet për të qenë i drejtë e për të shfajësuar atë që është në fenë e Jezusit.

27 A ka, pra, arsye për t’u krenuar?
‑ Kurrsesi!
‑ Në saje të cilit Ligj? Në saje të veprave?
‑ Jo, por vetëm në saje të fesë! 

28 Sepse ne mendojmë se njeriu shfajësohet me anë të fesë, pa veprat e Ligjit.

29 A thua Hyji është vetëm i hebrenjve? A nuk është gjithashtu edhe i paganëve?
Po, edhe i paganëve! 

30 Sepse është vetëm një Hyj: ai do të shfajësojë të rrethprerët për arsye të fesë e të parrethprerët me anë të fesë.


Psalm: Psalm 130:1-6     

1 Këngë shtegtimi.
Prej humnerës klitha tek ti, o Zot,

2 o Zot, dëgjoje britmën time!
Le ta dëgjojnë veshët e tu,
zërin e lutjes sime.

3 Nëse do t’i mbash mend paudhësitë, o Zot,
O Zot, e kush do të qëndrojë para teje?

4 Por tek ti gjendet falja
që të dimë të të druajmë.

5 Shpresoj në ty, o Zot,
shpirti im shpreson në premtimin e tij.
E pret 

6 shpirti im Zotin
më tepër se rojtarët agimin.
Më tepër se rojtarët agimin


UNGJILLI: LUKA 11:47-54

47 Të mjerët ju, që u ngritni përmendore profetëve, kurse etërit tuaj i patën vrarë. 

48 Kështu dëshmoni se i pëlqeni veprat e etërve tuaj; ata vranë, ndërsa ju ndërtoni përmendore! 

49 Këndej edhe Dija e Hyjit tha: ‘Do t’u dërgoj profetë e apostuj. Ata do t’i vrasin e do t’i salvojnë disa prej tyre, 

50 që prej kësaj breznie të kërkohet llogari për gjakun e derdhur të të gjithë profetëve që nga krijimi i botës: 

51 prej gjakut të Abelit deri te gjaku i Zakarisë, që u vra ndërmjet lterit e shenjtërores’. Po, unë po ju them: do të kërkohet llogari prej kësaj breznie.

52 Vaj për ju, mësues të Ligjit! Ju e morët çelësin e dijes: vetë nuk hytë e, ata që deshën të hyjnë, i penguat!”

53 Kur Jezusi doli prej andej, skribët e farisenjtë filluan ta sulmojnë rëndë dhe t’i bëjnë shumë pyetje, 

54 duke i ngrehur leqe për ta zënë pisk në ndonjë fjalë prej gojës së tij.




Hyji e dërgoi engjëllin Gabriel në një qytet të Galilesë, që quhet Nazaret, tek një virgjër, që ishte e fejuar me një njeri, që quhej Jozef, prej fisit të Davidit. Virgjëra quhej Mari.

-- LukA 1:26


Vaj edhe për ju, mësues të Ligjit ... - E Merkure 16 Tetor 2013

Leximi i parë: Romakëve 2:1-11
Psalm: Psalm 62:2-3, 6-7, 9
UNGJILLI: LUKA 11:42-46



Leximi i parë: Romakëve 2:1-11

1 Prandaj, nuk do të kesh si të arsyetohesh, o njeri ‑ kushdo të jesh ‑ që gjykon tjetrin! Sepse duke gjykuar tjetrin, dënon vetveten, pasi ti që gjykon i bën të njëjtat gjëra.

2 Dhe ne mirë e dimë: gjykimi i Hyjit zbatohet sipas të vërtetës kundër atyre që bëjnë vepra të tilla.

3 A të thotë mendja, o njeri, ti që gjykon ata që bëjnë vepra të tilla, se do t’i shpëtosh gjyqit të Hyjit, ndërsa edhe ti bën të njëjtat veprime? 

4 Apo ndoshta e bën në asgjë begatinë e mirësisë, të durimit e të bujarisë së Hyjit, duke mos u kujtuar se mirësia e tij të thërret e të nxit për kthim? 

5 Me kryeneçësinë tënde dhe me zemër që nuk mendon të kthehet, ti grumbullon kundër vetes hidhërim për Ditën e zemërimit dhe për Ditën e dëftimit të Gjyqit të drejtë të Hyjit, 

6 i cili do ta shpaguajë secilin sipas veprave të tij: 

7 me jetën e pasosur ata që, me qëndresë në vepra të mira, kërkojnë lumturinë, nderin dhe pashkatërrueshmërinë; 

8 ndërsa do të ketë zemërim e përbuzje për ata që me kryeneçësi i kundërshtojnë të vërtetës e i binden paudhësisë. 

9 Çdo njeri që vepron të keqen do ta mbulojnë vuajtje e vështirësi: më parë judeun e pastaj grekun; 

10 ndërsa, secili që vepron të mirën: më parë judeu e pastaj greku, do të ketë lumturi, nder e paqe! 

11 Sepse Hyji nuk i mban kujt krah.


Psalm: Psalm 62:2-3, 6-7, 9

Vetëm në Hyjin pusho, shpirti im,
sepse prej tij vjen shpëtimi im.

3 Vetëm ai është qeta ime e shpëtimi im,
kështjella ime: më kurrë nuk do të trandem!

6 Vetëm në Hyjin pusho, o shpirti im,
vetëm në të qëndron shpresa ime!

7 Vërtet vetëm Ai është Hyji im e shpëtimi im,
kështjella ime: më kurrë nuk do të trandem!

9 Shpreso në të gjithmonë, o popull,
atij hapi zemrën,
sepse Hyji është strehimi ynë.


UNGJILLI: LUKA 11:42-46

42 Porse; vaj për ju, o farisenj që jepni të dhjetën e mendrës, të ryzës e të çdo barishteje, por e lini pas shpine drejtësinë dhe dashurinë e Hyjit! Këto të fundit është dashur të bëhen e ato të parat s’është dashur të lihen!

43 Vaj për ju farisenj, sepse jua ka ënda katedrën e parë në sinagoga dhe përshëndetjet në sheshe!

44 Të mjerët ju, sepse jeni porsi varret që nuk shihen e njerëzit, pa ditur, ecin mbi to!”

45 Atëherë një mësues i Ligjit i tha:
“Mësues, ti, duke folur kështu, po na fyen edhe ne!”

46 “Vaj edhe për ju, mësues të Ligjit ‑ iu përgjigj Jezusi ‑ sepse u ngarkoni njerëzve barrë që mezi mund të mbarten, ndërsa ju vetë as me gisht të dorës nuk i prekni!


Zoti është drita ime dhe shpëtimi im, kë do të kem frikë?
-- Psalm 26:1

Biri i njeriut do të jetë shenjë për këtë brezni - E Hene 14 Tetor 2013

Leximi i parë: Romakëve 1:1-7
Psalm: Psalm 98:1-4
UNGJILLI: LUKA 11:29-32



Leximi i parë: Romakëve 1:1-7

1 Pali, shërbëtori i Jezu Krishtit, i thirrur për të qenë apostull,
veçanërisht i caktuar për të kumtuar Ungjillin e Hyjit ‑

2 të cilin Hyji e kishte premtuar që më parë me anë të profetëve të vet
në Shkrimet e Shenjta

3 mbi Birin e vet, i cili është, për kah trupi, pasardhës i Davidit,

4 por i dëftuar për Birin e Hyjit me të gjitha pushtetet me anë të Shpirtit Shenjt pas ngjalljes prej të vdekurve, mbi Jezu Krishtin, Zotin tonë,

5 nëpër të cilin ne morëm hirin të jemi apostuj, që, në nder të Emrit të tij,
t’i sjellim në dëgjesë të fesë të gjithë paganët,

6 ndër të cilët jeni edhe ju të grishur prej Jezu Krishtit:

7 të gjithëve në Romë, të dashurve të Hyjit, të grishurve, shenjtërve:
Hir e paqe prej Hyjit, Atit tonë, dhe prej Jezu Krishtit Zot.


Psalm: Psalm 98:1-4

1 Psalm.
Këndoni Zotit një këngë të re,
sepse bëri vepra të mrekullueshme!
Ngadhënjeu me fuqi të së djathtës së vet,
me fuqi të krahut të vet të shenjtë.

2 Zoti e dëftoi shpëtimin e vet,
përpara paganëve e zbuloi drejtësinë e vet.

3 I ra ndër mend dashuria dhe besnikëria e vet
kundrejt shtëpisë së Izraelit.
Të gjitha skajet e botës e panë
shëlbimin e Hyjit tonë.

4 Mbarë toka le t’i brohorisë Zotit,
le të gëzojë, të duartrokasë e të këndojë.


UNGJILLI: LUKA 11:29-32

Të dijshmit kërkojnë një shenjë
(Mt 12, 38‑42; Mk 8, 12)

29 Pasi populli shkonte gjithnjë duke u bashkuar ai filloi të flasë:
“Kjo brezni është brezni e keqe: po kërkon një shenjë! Porse nuk do t’i jepet shenjë tjetër, përveç shenjës së Jonës. 

30 Sikurse Jona u bë shenjë për ninivitët, ashtu edhe Biri i njeriut do të jetë shenjë për këtë brezni.

31 Mbretëresha e Jugut ditën e Gjyqit do të ngrihet bashkë me njerëzit e kësaj breznie dhe do t’i dënojë, sepse ajo erdhi nga skaji i dheut për të dëgjuar urtinë e Salomonit. Dhe, ja, këtu është Dikush më i madh se Salomoni!

32 Njerëzit e Ninivës, ditën e Gjyqit, do të ngrihen bashkë me këtë brezni dhe do ta dënojnë, sepse u kthyen me predikimin e Jonës, dhe, ja, këtu Dikush më i madh se Jona!”




Tek Ti, o Zot, e lartësoj shpirtin tim! Hyji im, në Ty shpresoj: mos lejo të turpërohem! - Psalm 24:1,2


Feja jote të shpëtoi - E Djele, 13 Tetor 2013

Leximi i parë: 2 i Mbretërve 5:14-17
Psalm: Psalm 98:1-4
Leximi i dytë: 2 e Timoteut 2:8-13
UNGJILLI: LUKA 17:11-19


Leximi i parë: 2 i Mbretërve 5:14-17

14 Naamani zbriti dhe u la shtatë herë në Jordan si i kishte urdhëruar njeriu i Hyjit, iu shërua trupi i tij, iu bë si trupi i fëmijës së njomë dhe u shërua.

15 Atëherë me mbarë ndjekësorinë e vet u kthye te njeriu i Hyjit, qëndroi përpara tij e i tha: “Tani po e di se s’ka Perëndi në asnjë vend tjetër, përveç në Izrael! Po të lutem, pra, prano një dhuratë prej anës së shërbëtorit tënd”.

16 Por ai iu përgjigj: “Pasha jetën e Zotit, kujt i shërbej, assesi s’i marr”. Megjithëse iu vu për së tepërmi, Elizeu nuk pranoi assesi.

17 I tha Naamani: “Mirë, pra, si të duash. Por, po të lutem, më lejo të marr unë, shërbëtori yt, vetëm aq dhe sa mund të bartin dy mushq, sepse shërbëtori yt nuk do t’i kushtojë fli shkrumbimi ndonjë zoti tjetër përveç Zotit.


Psalm: Psalm 98:1-4

1 Psalm.
Këndoni Zotit një këngë të re,
sepse bëri vepra të mrekullueshme!
Ngadhënjeu me fuqi të së djathtës së vet,
me fuqi të krahut të vet të shenjtë.

2 Zoti e dëftoi shpëtimin e vet,
përpara paganëve e zbuloi drejtësinë e vet.

3 I ra ndër mend dashuria dhe besnikëria e vet
kundrejt shtëpisë së Izraelit.
Të gjitha skajet e botës e panë
shëlbimin e Hyjit tonë.

4 Mbarë toka le t’i brohorisë Zotit,
le të gëzojë, të duartrokasë e të këndojë.


Leximi i dytë: 2 e Timoteut 2:8-13

8 Kujtoje Jezu Krishtin të ngjallur nga të vdekurit nga trungu i Davidit sipas Ungjillit që unë predikoj, 

9 për shkak të të cilit vuaj deri edhe në pranga sikur të isha keqbërës. Por fjala e Hyjit nuk është në pranga! 

10 Këndoj edhe duroj çdo vështirësi për të mirën e të zgjedhurve që edhe ata ta fitojnë shëlbimin, që është në Krishtin Jezus bashkë me lumturinë e amshueshme.

11 E vërtetë është kjo fjalë: »Nëse ne vdiqëm bashkë me Të, bashkë me Të edhe do të jetojmë.

12 Nëse durojmë në qëndresë, bashkë me Të do të mbretërojmë. Nëse i biem mohit, edhe Ai do të na bjerë mohit.

13 Nëse ne nuk jemi besnikë – Ai mbetet besnik! Sepse Ai kurrsesi nuk mund ta mohojë vetveten«.


UNGJILLI: LUKA 17:11-19

Shërimi i dhjetë të gërbulurve

11 Duke udhëtuar për Jerusalem, kaloi nëpër Samari e Galile. 

12 Kur hyri në një fshat [i] dolën para dhjetë të gërbulur. Ata zunë vend larg 

13 e filluan të bërtasin: “Jezus, Mësues, ki mëshirë për ne!”

14 Kur i pa u tha: “Shkoni e paraqitjuni priftërinjve!”
E ndodhi që, ndërsa po shkonin, u pastruan.

15 Njëri prej tyre, si pa se u shërua, u kthye duke e lëvduar Hyjin me zë të madh lartë. 

16 Ra përmbys para këmbëve të Jezusit dhe e falënderoi. E ky ishte samaritanas. 

17 Jezusi mori fjalën e tha:
Po a nuk u pastruan të dhjetët? Ku janë nëntë të tjerët? 

18 A nuk u gjet asnjë që të kthehet e t’i japë lavdi Hyjit, përveç këtij të huaji? 

19 Çohu e shko ‑ i tha ‑ feja jote të shpëtoi!”



Kur të luteni, thoni: O Atë, ... - E Merkure 9 Tetor 2013

Leximi i parë: Jona 4:1-11
Psalm: Psalm 86:3-6, 9-10
UNGJILLI: LUKA 11:1-4


Leximi i parë: Jona 4:1-11

1 Jona u pikëllua shumë dhe u zemërua.

2 Iu lut Zotit e tha: “Ah, o Zot, a nuk doli pikërisht ashtu siç e mendoja unë, kur ende isha në vendin tim? Kjo ishte arsyeja pse mendoja të iki në Tarsis! Sepse e dija mirë se ti je Hyj i butë e i mëshirshëm, zemërgjerë e mëshirëmadh dhe se e fal të keqen. 

3 Tani, pra, o Zot, ma merr jetën, po të lutem, sepse për mua më e mirë është vdekja se jeta.” 

4 Zoti iu përgjigj: “A të thotë mendja se e ke me të drejtë të hidhërohesh kështu?”

5 Jona doli prej qytetit e zuri vend përballë, në lindje të qytetit. Punoi aty një kasolle dhe u ul të rrijë nën hijen e saj për të parë se çka do të ndodhë në qytet. 

6 Zoti Hyj bëri të mbijë një urth që u rrit përmbi Jonën për t’i bërë hije mbi kokë e për ta shëruar nga pikëllimi i tij. Jona iu gëzua urthit me gëzim tepër të madh.

7 Por, të nesërmen, në agim, Hyji çoi një krimb, i cili e breu urthin dhe urthi u tha. 

8 Pastaj, kur u çua lart dielli, Hyji bëri të fryejë era e nxehtë lindore. Edhe dielli e goditi në kokë Jonën. Jona u mek, dëshiroi të vdesë e tha:
“Më mirë është për mua të vdes se të rroj!”

9 Hyji i tha Jonës: “A të thotë mendja se ke të drejtë të hidhërohesh për shkak të urthit?” Iu përgjigj: “Po, kam të drejtë të zemërohem deri në vdekje!” 

10 Zoti ia priti: “Ty po të dhimbset urthi rreth të cilit nuk u mundove aspak as nuk bëre asgjë që të rritet, i cili për një natë mbiu e për një natë u tha: 

11 e unë të mos e fal Ninivën, qytetin e madh, në të cilin janë më se njëqind e njëzet mijë njerëz, të cilët nuk dinë ta dallojnë të djathtën e vet nga e majta e vet dhe një numër i madh kafshësh?”


Psalm: Psalm 86:3-6, 9-10

3 Ki mëshirë për mua, o Zot,
se gjithë ditën të thërras në ndihmë.

4 Gëzoje shpirtin e shërbëtorit tënd,
sepse tek ti, o Zot, e lartësoj shpirtin tim.

5 Sepse ti, o Zot, je i ëmbël e i butë,
plot mëshirë për ata që të thërrasin në ndihmë.

6 Dëgjoje, o Zot, lutjen time,
vështroje zërin e lutjes sime.

9 Të gjithë paganët prej teje të krijuar,
do të vijnë e do të të adhurojnë, o Zot,
dhe do të madhërojnë Emrin tënd,

10 sepse ti je i madhërueshëm e bën mrekulli,
ti je i vetmi Hyj.



UNGJILLI: LUKA 11:1-4

Një ditë Jezusi po lutej diku në një vend. Kur e kreu lutjen, i tha njëri prej nxënësve: “Zotëri, na mëso edhe ne të lutemi, siç i mësoi edhe Gjoni nxënësit e vet.”

“Kur të luteni ‑ u tha Jezusi ‑ thoni:

O Atë!
U shenjtëroftë Emri Yt!
Ardhtë Mbretëria jote!
Na jep çdo ditë bukën tonë të përditshme!
Na i fal mëkatet tona,
sepse edhe ne i falim fajtorët tanë.
E mos lejo të biem në tundim!”