Pages

Kush nuk është kundër jush, është me ju - E Hene 30 Shtator 2013

Leximi i parë: Zakaria 8:1-8
Psalm: Psalm 102:16-21, 22-23
UNGJILLI: LUKA 9:46-50


Leximi i parë: Zakaria 8:1-8

1 Atëherë erdhi kjo fjalë e Zotit të Ushtrive: 

2 Kështu thotë Zoti i Ushtrive:
“Flakë jam ndezur me dashuri ziliqare për Sionin,
digjem në të mirën e tij nga zemërimi.”

3 Kështu thotë Zoti:
Po kthehem në Sion, dua të banoj në Jerusalem.
Jerusalemi do të quhet Qyteti i Besnikërisë e Mali i Zotit të Ushtrive
Mali i Shenjtërisë.

4 Kështu thotë Zoti i Ushtrive:
Pleq e plaka prapë do të rrinë në sheshe të Jerusalemit:
secili do ta ketë në dorë shkopin për shkak të moshës së thellë!

5 Sheshet e qytetit do të mbushen plot me meca e me cuca
që do të luajnë nëpër tregjet e tija!

6 Kështu thotë Zoti i Ushtrive:
Nëse kjo duket një gjë e vështirë për sytë e Tepricës së këtij populli
për ato ditë, pse a do të jetë e vështirë edhe për sytë e mi? ‑
thotë Zoti i Ushtrive.

7 Kështu thotë Zoti i Ushtrive:
Ja unë po shpëtoj popullin tim prej tokës së lindjes dhe prej tokës së perëndimit.

8 Do t’i kthej e do të banojnë në JerusalemAta do të jenë populli im
e unë do të jem Hyji i tyre në besnikëri e në drejtësi.


Psalm: Psalm 102:16-21, 22-23

16 Kur Zoti do të rindërtojë Sionin dhe do të duket në lavdinë e tij.

17 Ai do të dëgjojë lutjen e njerëzve të braktisur dhe nuk do ta përbuzë lutjen e tyre.

18 Kjo do të shkruhet për brezin e ardhshmëm, dhe populli që do të krijohet do të lëvdojë Zotin,

19 sepse ai shikon nga lartësia e shenjtërores së tij; nga qielli Zoti këqyr dheun,

20 për të dëgjuar vajtimin e robërve, për të çliruar të dënuarit me vdekje;

21 me qëllim që në Sion të shpallin emrin e Zotit dhe në Jeruzalem lavdinë e tij,

22 kur popujt dhe mbretëritë do të mblidhen bashkë për t`i shërbyer Zotit.

23 Rrugës ai ka pakësuar fuqinë time dhe ka shkurtuar ditët e mia.


UNGJILLI: LUKA 9:46-50

Kush është më i madhi?
(Mt 18, 1‑5; Mk 9, 33‑37)

46 Ndër ta lindi kjo çështje: cili prej tyre do të ishte më i madhi. 

47 Jezusi, duke e ditur ç’mendime u vlonin në zemër, e mori një fëmijë, e afroi pranë vetes,

48 dhe u tha:
Kush e pranon këtë fëmijë në emrin tim, më pranon mua, e kush më pranon mua, pranon atë që më dërgoi mua. Përnjëmend, kush është ndër ju më i vogli, ai është vërtet i madh.”

Kush nuk është kundër jush, është me ju
(Mk 9, 38‑40)

49 Atëherë Gjoni mori fjalën dhe i tha:
“Mësues, pamë një njeri që dëbonte djajtë në Emrin tënd. Ne ia ndaluam, sepse nuk vjen pas teje me ne.”

50 Jezusi iu përgjigj:
“Mos ia ndaloni, sepse, kush nuk është kundër jush, është me ju.”


Mbrojtja kryesore është një ruajtje e kujdesshme, dhe duke mos lejuar tolerime. Pastërtia është një xhevahir i çmuar, dhe i zoti i një guri të çmuar nuk do të ëndërronte t’i shpaloste pasuritë e tij në praninë e hajdutëve.

-- Shën Gjon Bosko


Vërjani mendjen mirë udhës që keni marrë - E Enjte 26 Shtator 2013

Leximi i parë: Hagai 1:1-8
Psalm: Psalm 149:1-6, 9
UNGJILLI: LUKA 9:7-9


Leximi i parë: Hagai 1:1-8

1 Në vitin e dytë të mbretit Dari, në të gjashtin muaj, të parën ditë të muajit, me anë të profetit Agje, i qe drejtuar fjala e Zotit Zorobabelit, birit të Salatielit, qeveritarit të Judës, edhe Jezuait, birit të Jozedekut, kryepriftit: 

2“Kështu thotë Zoti i Ushtrive: Ky popull po thotë: ‘Ende s’ka ardhur koha të ndërtohet Shtëpia e Zotit. ’” 

3 Këndej edhe erdhi fjala e Zotit me anë të profetit Agje: 

4 “Vallë, për ju qenka koha të banoni në shtëpi të tavanosura e kjo Shtëpi të mbesë shkretë? 

5 Tani, pra, kështu thotë Zoti i Ushtrive: Vërjani mendjen mirë udhës që keni marrë: 

6 mbollët shumë, por bashkuat pak, hëngrët, por nuk u ngitë, pitë, por jo sa ju deshi zemra, u veshët, por nuk u ngrohët e, ai që punoi me mëditje, e vuri në qese të shqyer. 

7 Kështu thotë Zoti i Ushtrive: Vërjani mendjen mirë udhës që keni marrë! 

8 Ngjituni në mal, sillni dru e ndërtojeni Shtëpinë; kjo gjë do të më pëlqejë e do ta dëftoj lavdinë time ‑ thotë Zoti.


Psalm: Psalm 149:1-6, 9

1 Aleluja. Këndojini Zotit një këngë të re, këndoni lavdinë e tij në kuvendin e shenjtorëve.

2 Le të ngazëllohet Izraeli tek ai që e ka bërë, le të ngazëllohen bijtë e Sionit te Mbreti i tyre.

3 Le të lëvdojnë emrin e tij me valle, të këndojnë lavdet e tij me dajre dhe me qeste,

4 sepse Zoti kënaqet me popullin e tij; ai i kurorëzon me shpëtim njerëzit e përulur.

5 Le të ngazëllohen shenjtorët në lavdi, le të këndojnë nga gëzimi mbi shtretërit e tyre.

6 Le të kenë në gojën e tyre lavdet e Perëndisë dhe në dorën e tyre një shpatë që pret nga të dy anët;

9 për të zbatuar mbi ta gjykimin e shkruar. Ky është nderi që u rezervohet mbarë shenjtorëve të tij. Aleluja.



UNGJILLI: LUKA 9:7-9

Shqetësimi i Herodit
(Mt 14, 1‑12; Mk 6, 14‑29)

7 Herodi tetrark kishte dëgjuar për të gjitha këto ngjarje dhe ishte shumë i shqetësuar, sepse disa thoshin: “U ngjall Gjoni së vdekuri!” 

8 Disa të tjerë: “U duk Elia!” Disa të tjerë prapë: “U ngjall një prej profetëve të vjetër!”

9 Kurse Herodi tha: “Gjoni! Atij unë ia preva kokën! Po ky kush do të jetë, për të cilin po dëgjoj kaq shumë?” E kërkonte rastin ta shihte.




I dashur Zot, Ti e njeh dobësinë time. Çdo mëngjes unë e bëj plan të jem e përulët, dhe në mbrëmje e kuptoj se shpesh kam qënë me faj për krenari. Pamja e këtyre gabimeve më tundon për dekurajim. Por e di se vetë dekurajimi është një formë krenarie. Megjithatë, unë dëshiroj, o Zoti im, ta ngre gjithë besimin tim mbi Ty. Pasi Ti mund të bësh të gjitha gjërat, denjo të futësh në shpirtin tim këtë virtyt që unë dëshiroj.

-- Shën Tereza e Lisieux


Nëna dhe vëllezërit e Jezusit - E Marte 24 Shtator 2013

Leximi i parë: Esdra 6:7-8, 12, 14-20
Psalm: Psalm 122:1-5
UNGJILLI: LUKA 8:19-21


Leximi i parë: Esdra 6:7-8, 12, 14-20

7 "Mos e pengoni rindërtimin e atij Tempulli të Hyjit. Prijësi i judenjve dhe paria e tyre le ta ndërtojnë Shtëpinë e Hyjit në vendin e vet. 

8 Dhe ja, urdhërat e mi se si duhet ju të silleni ndaj parisë së judenjve që po e rindërtojnë atë Tempull të Hyjit: atyre njerëzve me kujdes e pa ndërprerje le t’u jepen shpenzimet nga arka e mbretit, d. t. th. nga tatimet që mblidhen në krahinën e Përtejlumit. 

12 Ndërsa Hyji, që e ka vendosur Emrin e tij të banojë aty, i shkatërroftë të gjitha mbretëritë dhe atë popull që ta shtrijë dorën e vet për ta përbuzur e për ta rrënuar Shtëpinë e Hyjit në Jerusalem.
Unë Dariu e dhashë këtë urdhëresë. Dua që të zbatohet pikë për pikë”.

14 Pleqtë e judenjve vazhduan ndërtimin e Tempullit të përkrahur me guxim nga profeti Agjé dhe nga Zakaria, biri i Ados. E kryen ndërtimin me urdhrin e Hyjit të Izraelit dhe me urdhër të Kirit, të Dariut e të Artakserksit, mbretërve të përsianëve. 

15 E përfunduan ndërtimin e Shtëpisë së Hyjit, të tetën ditë të muajit Adar, d. t. th. në vitin e gjashtë të mbretërimit të mbretit Dari.

16 Atëherë bijtë e Izraelit ‑ priftërinj, levitë e të tjerët të riatdhesuar nga mërgimi me gëzim të madh e bënë kushtimin e kësaj Shtëpie të Hyjit. 

17 Në shugurimin e kësaj Shtëpie të Hyjit i kushtuan njëqind mëzetër, dyqind desh, katërqind qengja dhe, si fli shpërblyese për mëkatet e mbarë Izraelit, dymbëdhjetë cjep, sipas numrit të fiseve të Izraelit. 

18 Pastaj i caktuan priftërinjtë sipas rendeve të tyre dhe levitët sipas veshjes së tyre në shërbimin e Hyjit në Jerusalem ashtu si shkruan në Librin e Moisiut.

19 Izraelitët e riatdhesuar nga mërgimi i kremtuan Pashkët në ditën e katërmbëdhjetë të muajit të parë. 

20 Të gjithë levitët u pastruan. Të pastruar të gjithë, flijuan Pashkët për të gjithë të riatdhesuarit, për vëllezërit e vet priftërinjtë dhe për vete.


Psalm: Psalm 122:1-5

1 U gëzova kur më thanë: "Shkojmë në shtëpinë e Zotit".

2 Këmbët tona u ndalën brenda portave të tua, o Jeruzalem.

3 Jeruzalemi është ndërtuar si një qytet i bashkuar mirë,

4 ku ngjiten fiset, fiset e Zotit, për të kremtuar emrin e Zotit.

5 Sepse aty janë vënë fronet për gjykimin, fronet e shtëpisë së Davidit.


UNGJILLI: LUKA 8:19-21

Nëna dhe vëllezërit e Jezusit
(Mt 12, 46‑50; Mk 3, 31‑35)

19 Nëna e tij dhe vëllezërit erdhën ta shohin por s’mundën të afroheshin tek ai prej popullit. 

20 E lajmëruan:
“Nëna jote e vëllezërit e tu, janë jashtë e dëshirojnë të të shohin.”

21 Ai iu përgjigj:
“Nëna ime e vëllezërit e mi ‑ janë këta ‑ që e dëgjojnë dhe e zbatojnë Fjalën e Hyjit.”



Lutja zbulon tek shpirtrat kotësinë e gjërave të tokës dhe kënaqësitë. Ajo i mbush ata me dritë, forcë dhe ngushëllim; dhe ju jep atyre një tregues të harmonisë me paqe të shtëpisë sonë qiellore.

-- Shën Rosa e Viterbos


E çka mund të japë njeriu si shkëmbim për jetën e vet? - E Hene 23 Shtator 2013

Leximi i parë: Galatasve 2:19-20
Psalm: Psalm 16:1-2, 5-8, 11
UNGJILLI: MATEU 16:24-27



Leximi i parë: Galatasve 2:19-20

19 Sepse, me anë të Ligjit, vdiqa për Ligjin që të jetoj për Hyjin; u kryqëzova bashkë me Krishtin; 

20 jetoj, por jo më unë, në mua jeton Krishti. E këtë jetë që tani e jetoj në trup, e jetoj në fenë e Birit të Hyjit, i cili më deshi dhe e flijoi vetveten për mua.


Psalm: Psalm 16:1-2, 5-8, 11

1 Më mbro, o Perëndi, sepse unë po kërkoj strehë te ti.

2 I thashë Zotit: "Ti je Zoti im; nuk kam asnjë të mirë veç teje".

5 Zoti është pjesa ime nga trashëgimia dhe kupa ime; ti, o Zot, ruaje fort atë që më ka rënë në short.

6 Mua fati më ka rënë në vende të këndshme; po, një trashëgimi e bukur më ka rënë.

7 Unë do të bekoj Zotin që më këshillon; zemra ime më mëson edhe natën.

8 Unë e kam vënë vazhdimisht Zotin përpara syve të mi; duke qenë se ai rri në të djathtën time, unë nuk do të hiqem kurrë nga vendi.

11 Ti do të më tregosh shtegun e jetës; ka shumë gëzim në praninë tënde; në të djathtën tënde ka kënaqësi në përjetësi.


UNGJILLI: MATEU 16:24-27

24 Atëherë Jezusi u tha nxënësve të vet:
“Nëse ndokush dëshiron të vijë pas meje, le ta mohojë vetveten, le ta marrë kryqin e vet e le të vijë pas meje! 

25 Sepse, kush do ta ruajë jetën e vet, do ta bjerrë, kurse ai që e bjerr për shkak timin, do ta gjejë.

26 Ç’dobi ka njeriu nëse e fiton mbarë botën, por humb jetën? E çka mund të japë njeriu si shkëmbim për jetën e vet?

27 Do të vijë, për të vërtetë, Biri i njeriut në lavdinë e Atit të vet bashkë me engjëjt e vet dhe atëherë do t’i paguajë të gjithë sipas veprave të tyre.


Nuk mund t’i shërbeni Hyjit dhe pasurisë - E Djele 22 Shtator 2013

Leximi i parë: Amosi 8:4-7
Psalm: Psalm 113:1-2, 4-8
Leximi i dytë: 1 e Timoteut 2:1-8
UNGJILLI: LUKA 16:1-13


Leximi i parë: Amosi 8:4-7

Kundër tradhtarëve e shfrytëzuesve

4 Dëgjojeni këtë ju, që e shtypni skamnorin, që shfrytëzoni nevojtarët e vendit,

5 ju që thoni: ‘Kur po kalon më hëna e re, të mund t’i shesim mallrat?’
Edhe e shtuna e të mund të shesim grurë? Të zvogëlojmë masën e të shtojmë siklin, të përdorim peshore të rreme,

6 për t’i blerë skamnorët me para, të vobektin me një palë këpucë,
t’i shesim edhe të hedhat e grurit?’

7 Zoti përbetohet me nderin e Jakobit: “Kurrën e kurrës s’do t’i harroj veprat e tyre!


Psalm: Psalm 113:1-2, 4-8

1 Aleluja. Lëvdoni, o shërbëtorë të Zotit, lëvdoni emrin e Zotit.
2 Qoftë i bekuar emri i Zotit tani dhe përjetë.
4 Zoti shkëlqen mbi tërë kombet, lavdia e tij ndodhet përmbi qiejtë.
5 Kush i përngjan Zotit, Perëndisë tonë, që banon në vende shumë të larta,
6 kush ulet për të parë gjërat që ndodhen në qiejtë dhe mbi tokë?
7 Ai e ngre të mjerin nga pluhuri dhe nevojtarin nga plehrat,
8 për ta bërë të ulet me princat, me princat e popullit të tij.


Leximi i dytë: 1 e Timoteut 2:1-8

1 Po të porosis, pra, më së pari le të bëhen kërkesa, lutje, lutja, falënderim për të gjithë njerëzit, 

2 për mbretër dhe për të gjithë ata që janë në pushtet, që ta kalojmë jetën të qetë e të kthjellët në përkushti të plotë dhe në mënyrë të denjë. 

3 Kjo gjë është e mirë dhe e pëlqyeshme para Hyjit, Shëlbuesit tonë, 

4 vullneti i të cilit është që të shëlbohen të gjithë njerëzit dhe ta arrijnë njohjen e së vërtetës. 

5 Sepse, Hyji është një i vetëm, një i vetëm është edhe Ndërmjetësi mes Hyjit e njerëzve: Njeriu ‑ Jezu Krishti,

6 i cili e flijoi vetveten si shpërblim për të gjithë njerëzit. Këtë dëshmi Ai e dha në kohën e caktuar. 

7 Kësaj dëshmie unë iu bëra predikatar dhe apostull ‑ ju them të vërtetën, nuk gënjej ‑ mësues i fesë dhe i së vërtetës për paganët.

8 Dua, pra, që meshkujt në çdo vend të luten duke i lartësuar duart e pastra pa hidhërim dhe pa grindje.


UNGJILLI: LUKA 16:1-13

1 U thoshte edhe nxënësve të vet: “Ishte një njeri i pasur, i cili kishte mbarështuesin që e paditën se ia shkapërderdhte pasurinë. 

2 E thirri dhe i tha: ‘Ç’po dëgjoj kështu për ty? Jep llogari për mbarështimin tënd, sepse t’i s’mund të jesh më mbarështues.’

3 Atëherë mbarështuesi tha me vete: ‘Çka të bëj pasi zotëria po ma heq mbarështimin? Të mih... ? Nuk mundem! Të dal e të lyp... ? Më vjen turp! 

4 E di ç’do të bëj që njerëzit të më pranojnë në shtëpitë e veta kur të nxirrem prej mbarështimit.’

5 Atëherë thirri një nga një borxhlinjtë e zotërisë së vet. E pyeti të parin: ‘Sa i detyrohesh zotërisë tim?’ 

6 Ai iu përgjigj: ‘Një qind masë vaj.’ Mbarështuesi i tha: ‘Merre letrën tënde, ulu me të shpejtë e shkruaj pesëdhjetë!’ 

7 Pastaj e pyeti të dytin: ‘Po ti sa detyrohesh?’ Ai i tha: ‘Një qind kora grurë.’ I tha mbarështuesi: ‘Merre letrën tënde e shkruaj tetëdhjetë!’

8 E zotëria e lëvdoi mbarështuesin e padrejtë që punoi aq me shkathtësi. Dhe njëmend, bijtë e kësaj bote janë më të kujtueshëm në marrëdhënie me njëri-tjetrin se sa bijtë e dritës.

9 Ndërsa unë po ju them: fitoni për vete miq me anë të pasurisë së rreme të kësaj bote që, kur kjo t’ju mungojë, t’ju pranojnë në banesat e amshuara.

10 Kush është besnik në gjëra të vogla, është besnik edhe në gjëra të mëdha; e kush nuk është besnik në gjëra të vogla, ai nuk është besnik as në gjëra të mëdha. 

11 Po qe se nuk u dëftuat besnikë në pasurinë e rreme, kush do t’jua besojë pasurinë e vërtetë? 

12 Po qe se nuk u dëftuat të besueshëm në gjënë e huaj, kush do t’jua japë tuajën?

13 Asnjë shërbëtor nuk mund t’u shërbejë njëkohësisht dy zotërinjve:
Sepse, ose do ta urrejë njërin e tjetrin do ta dojë, ose pas njërit do të shkojë e tjetrin do ta përbuzë. Nuk mund t’i shërbeni Hyjit dhe pasurisë.”



Edhe unë po të them: Ti je Pjetër‑Shkëmb dhe mbi këtë shkëmb unë do ta ndërtoj Kishën time dhe dyert e ferrit s’do të ngadhënjejnë kundër saj! Ty do të t’i jap çelësat e Mbretërisë së qiellit: gjithçka të lidhësh mbi tokë, do të jetë e lidhur edhe në qiell e gjithçka të zgjidhësh mbi tokë, do të jetë e zgjidhur edhe në qiell.”

-- Mateu 16:18-19


Unë nuk erdha të ftoj të drejtët, por mëkatarët - E Shtune 21 Shtator 2013

Leximi i parë: Efesianëve 4:1-7, 11-13
Psalm: Psalm 19:2-5
UNGJILLI: MATEU 9:9-13


Leximi i parë: Efesianëve 4:1-7, 11-13

1 Ju përbej, prandaj, unë i burgosuri në Zotin: jetoni denjësisht si i ka hije thirrjes që keni marrë: 

2 me plot përvujtëri, butësi e duresë; durojeni njëri‑tjetrin me dashuri! 

3 Bëni çmosin ta ruani njësinë e Shpirtit me anë të paqes që ju bashkon. 

4 S’ka veçse një Trup të vetëm dhe një Shpirt të vetëm ‑ sikurse edhe jeni të grishur në një shpresë të vetme të thirrjes suaj. 

5 Nuk ka veçse një Zot, një fe, një pagëzim; 

6 një Hyj të vetëm, Atin e të gjithëve, i cili sundon mbi të gjithë, vepron nëpër të gjithë e banon në të gjithë.

7 Edhe secilit prej nesh i qe dhënë hiri me atë masë me të cilën Krishti deshi të na e dhurojë.

11 E Ai i ‘dha’ disa apostuj, disa të tjerë profetë, disa prapë ungjilltarë, disa të tjerë barinj dhe mësues, 

12 që shenjtërit t’i bëjë të aftë për veprën e shërbesës, për ndërtimin e trupit të Krishtit, 

13 derisa të gjithë ta arrijmë njësinë e fesë dhe njohjen e Birit të Hyjit deri në gjendjen e njeriut të përsosur, deri në masën që i përket pjekurisë së plotë të Krishtit: 


Psalm: Psalm 19:2-5

2 Një ditë i flet ditës tjetër dhe një natë ia tregon tjetrës.

3 Nuk kanë gojë, as fjalë; zëri i tyre nuk dëgjohet;

4 por harmonia e tyre përhapet mbi gjithë dheun dhe mesazhi i tyre arrin deri në skajin e botës; në qiejtë Perëndia ka vënë një çadër për diellin;

5 dhe ai është si një dhëndër që del nga dhoma e tij e martesës; ngazëllon si një trim që përshkon rrugën e tij.


UNGJILLI: MATEU 9:9-13

Thirrja e Mateut
(Mk 2, 13‑17; Lk 5, 27‑32)

9 Jezusi, si shkoi prej andej, pa një njeri që quhej Maté, ndenjur në doganë. Jezusi i tha: “Eja pas meje!” Ai u ngrit dhe shkoi pas tij.

10 Dhe, kur më vonë, Jezusi u ul në tryezë në shtëpi, ja se ia behën shumë tagrambledhës e mëkatarë e u ulën në tryezë bashkë me Jezusin e me nxënësit e tij. 

11 Farisenjtë kur e panë këtë, i pyetën nxënësit e tij:
“Pse mësuesi juaj ha bukë me tagrambledhës e me mëkatarë?”

12 Jezusi, kur i dëgjoi, u përgjigj:
“Mjeku nuk u duhet të shëndoshëve, por të sëmurëve! 

13 Shkoni e mësoni çka do të thotë: ‘Më pëlqen mëshira e jo flia!’ Sepse unë nuk erdha të ftoj të drejtët, por mëkatarët.”



Ndërsa akoma në këtë botë, ne duhet që të shlyejmë me gjithë zemër mëkatet e kryera në trup dhe ta bëjmë të mundur që Zoti të na shpëtoj kur ka akoma kohë. 
Kur ne të kemi ikur nga kjo botë, nuk do të jemi më në gjëndje të pendohemi dhe të rrëfejmë mëkatet tona. 
Ne duhet të bëjmë vullnetin e Atit, t'i mbajmë trupat e pastër dhe të ruajmë urdhërimet e Zotit, sepse kjo është mënyra për të fituar jetën e përjetshme.

-- Ligjërata e shekullit të dytë 


Feja jote të shpëtoi. Shko në paqe - E Enjte 19 Shtator 2013

Leximi i parë: 1 e Timoteut 4:12-16
Psalm: Psalm 111:7-10
UNGJILLI: LUKA 7:36-50


Leximi i parë: 1 e Timoteut 4:12-16

12 Askush të mos e përbuzë moshën tënde të re, por bëhu shembull për besimtarët në fjalë, në sjellje, në dashuri, në fe, në pastërti! 

13 Derisa të vij kushtohu Leximit, këshillimit dhe mësimit. 

14 Mos e lër pas dore hirin që është në ty, i cili të qe dhënë në saje të profecive dhe me vënien e duarve të kolegjit të pleqve. 

15 Kujdesohu për këto, jepu tërësisht pas tyre, që përparimi yt të jetë i dukshëm për të gjithë. 

16 Vërja mendjen vetes dhe mësimit! Të jesh i qëndrueshëm në këto gjëra! Sepse, duke vepruar kështu, do të shëlbosh veten dhe ata që të dëgjojnë.


Psalm: Psalm 111:7-10

7. Veprat e duarve të tij janë e vërteta dhe drejtësia; tërë urdhërimet e tij janë të qëndrueshme,

8. të patundura përjetë, për gjithnjë, të kryera me vërtetësi dhe drejtësi.

9. Ai i dërgoi popullit të tij shpëtimin, ka vendosur besëlidhjen e tij përjetë; i shenjtë dhe i tmerrshëm është emri i tij.

10. Frika e Zotit është zanafilla e diturisë; kanë dituri të madhe ata që zbatojnë në praktikë urdhërimet e tij; lëvdimi i tij vazhdon në përjetësi.


UNGJILLI: LUKA 7:36-50

Mëkatarja e falur

36 Një farise e grishi Jezusin për bukë. Ai hyri në shtëpinë e fariseut dhe u ul në tryezë. 

37 Kur, ja, hyri menjëherë një grua që ishte mëkatare e njohur në qytet. Ajo, kur mori vesh se Jezusi gjendej në tryezë, në shtëpinë e fariseut, mori një enë alabastri me parfum, 

38 zuri vend pas tij, te këmbët e tij dhe, duke qarë, filloi t’ia lajë këmbët me lot, t’ia fshijë me flokë, t’ia puthë e t’ia lyejë me parfum.

39 Kur e pa këtë gjë fariseu që e kishte thirrur, mendoi me vete: “Po të ishte ky profet, do ta dinte se kush dhe çfarë gruaje është kjo që po e përket: se është mëkatare.”

40 Jezusi mori fjalën dhe i tha:
“Simon, dua të të them diçka.”
“Fol, Mësues!” ‑ iu përgjigj ai.

41 “Një huadhënës ‑ vazhdoi Jezusi ‑ kishte dy borxhlinj. Njëri i kishte pesëqind e tjetri pesëdhjetë denarë. 

42 Pasi nuk kishin me çka t’ia kthenin, ua fali të dyve. Cili prej tyre do ta dojë më fort?”

43 Simoni iu përgjigj:
“Mendoj ai, të cilët i fali më shumë.”
“Mirë pleqërove! ‑ i tha Jezusi.

44 Dhe, si u soll kah gruaja, i tha Simonit:
“A po e sheh këtë grua? Hyra në shtëpinë tënde, ti nuk më dhe ujë për t’i larë këmbët. Kjo, përkundrazi, me lot m’i lau këmbët e me flokët e kresë m’i fshiu.

45 Ti nuk ma dhe puthjen e detyruar. Kjo, përkundrazi, që kur hyri, nuk pushon së puthuri këmbët e mia. 

46 Ti nuk ma leve kokën me vaj. Kjo, përkundrazi, me parfum m’i leu këmbët e mia. 

47 Këndej po të them: iu falën mëkatet e shumta, sepse tregoi dashuri të madhe. Ai, të cilit i falen më pak, më pak dashuri tregon.”

48 Atëherë i tha gruas:
“Të janë falur mëkatet!”

49 Ata që ishin në tryezë me të, filluan të mendonin me vete: “Kush është ky që po fal edhe mëkatet?!”

50 Por ai i tha gruas:
“Feja jote të shpëtoi. Shko në paqe!”




Ejani tek unë të gjithë ju që jeni të lodhur prej barrës së rëndë - E Merkure 18 Shtator 2013

Leximi i parë: 1 e Korintasve 12:31; 13:1-10, 13
Psalm: Psalm 25:1-5, 8-10
UNGJILLI: MATEU 11:25-30



Leximi i parë: 1 e Korintasve 12:31; 13:1-10, 13

31. Dëshironi dhuratat më të shkëlqyeshme! Dhe ja, po ju dëftoj më të shkëlqyshmen udhë!

1 Po t’i flisja gjuhët e njerëzve e të engjëjve, por po të mos kisha dashurinë,
do të isha porsi bronzi që kumbon e porsi cimbali që tingëllon.

2 Po ta kisha dhuratën e profecisë e t’i dija të gjitha misteret e të gjitha dituritë; po ta kisha edhe fenë e plotë, me të cilën të mund t’u ndërroja vend maleve, por po të më mungonte dashuria, s’do të isha asgjë!

3 Po ta ndaja lëmoshë mbarë pasurinë time dhe po ta jepja trupin tim të digjej, por, po të më mungonte dashuria, nuk do të më vlente asgjë!

4 Dashuria është zemërgjerë, është e dhimbshme, dashuria, nuk ka smirë,
nuk mbahet me të madh, nuk krenohet

5 nuk është e panjerëzishme, nuk kërkon interesin e vet, nuk hidhërohet,
nuk e mban mend të keqen,

6 nuk i kënaqet padrejtësisë, por i gëzohet të vërtetës.

7 Arsyeton gjithçka, beson gjithçka, shpreson gjithçka, duron gjithçka.

8 Dashuria nuk mbaron kurrë. Profecitë mbarojnë, gjuhët shuhen, njohuritë marrin fund.

9 Sepse njohuria jonë është e kufizuar dhe e kufizuar është profecia jonë.

10 Por, kur të arrijë përsosmëria, çka është e kufizuar do të marrë fund.

13 Tani, veç, mbetet feja, shpresa e dashuria ‑ këto të tria ‑ porse më e madhja ndër to është dashuria.


Psalm: Psalm 25:1-5, 8-10

1. Te ti, o Zot, e lartoj shpirtin tim.

2. O Perëndia im, kam besim te ti; bëj që të mos mbetem i zhgënjyer dhe që armiqtë e mi të mos triumfojnë mbi mua.

3. Po, bëj që asnjë nga ata që kanë besim te ti të mos zhgënjehet; u turpërofshin ata që sillen pabesisht pa shkak.

4. O Zot, më trego rrugët e tua, më mëso shtigjet e tua.

5. Më udhëhiq në të vërtetën tënde dhe më mëso, sepse ti je Perëndia i shpëtimit tim; unë shpresoj shumë te ti gjatë gjithë ditës.

8. Zoti është i mirë dhe i drejtë, prandaj ai do t`u mësojë rrugën mëkatarëve.

9. Ai do të udhëheqë njerëzit zemërbutë në drejtësi dhe do t`u mësojë të përulurve rrugën e tij.

10. Të gjitha rrugët e Zotit janë mirësi dhe vërtetësi për ata që respektojnë besëlidhjen e tij dhe porositë e tij.


UNGJILLI: MATEU 11:25-30

Jezusi premton paqen shpirtërore
(Lk 10, 21‑22)

25 Në atë kohë Jezusi mori fjalën e tha:
Po të bekoj, o Atë, Zotërues i qiellit e i dheut, që i fshehe këto gjëra nga të dijshmit e nga të urtët, e ua zbulove të vegjëlve.

26 Mirë, o Atë, pse të pëlqeu Ty kështu!

27 Ati më dorëzoi mua gjithçka dhe askush s’mund ta njohë Birin përveç Atit,
dhe askush s’mund ta njoh Atin, përveç Birit e përveç atij kujt Biri do që t’ia zbulojë.

28 Ejani tek unë të gjithë ju që jeni të lodhur prej barrës së rëndë e unë do t’ju çlodh. 

29 Merrni mbi vete zgjedhën time e pranoni t’ju mësoj unë që jam zemërbutë e i përvuajtur. Kështu do të gjeni pushim për shpirtrat tuaj,

30 sepse, vërtet, zgjedha ime është e ëmbël e barra ime e lehtë.”



Cila do të jetë kurora e atyre, që të përulët nga brënda dhe të tallur nga jashtë, e kanë imituar përulësinë e Shpëtimtarit tonë në formën e saj të plotë!
-- Shën Bernadette